Opdahl er årets festspelkunstnar. I sommar skal ei rekkje verk som ikkje har vore stilt ut tidlegare prege veggene i Ivar Aasen-tunet.
Kunstnaren bur på Godøy i Giske kommune, der han vert inspirert av den dramatiske naturen som kan utspele seg ved kysten.
– Det er lys, landskap, klima og det uttrykket landskapet gir i samband med årstidene som er viktig for meg. Eg går ut i naturen og ser og opplever naturen. Tek kanskje med ei skissebok. Så kjem det opp som biletidear i ettertid, seier Opdahl.
Til Aasen-tunet har han teke med tjue etsingar og fire måleri, som skal henge der i sommar.
– Tidlegare arbeidde eg mest med litografi, men dei siste åra har eg arbeidd med etsing i koparplater, seier Opdahl.